ТIелекьа улкаялъулго чемпион

Гьел къецазда гIахьаллъи гьабуна 54 регионаздаса 370 гIанасев спортсменас. Гьаб ахирисеб щуго сонида жаниб кIиабилеб нух буго гьениб гьединал чIахIиял къецал тIоритIулел. Чемпионаталъул къецал тIоритIана 10 батIиял цIайиялъул категориябаздаса.

Ахирисеб къоялъ спорт бокьулезе цIакъ гъира-шавкъ борхизабуна, бищун кIудияблъун кколеб 130 кг цIайиялде щвезегIан категориялда цеве вахъарав нилъер ракьцояв, ТIелекь росулъа Къурбан Нажмудиновас. Гьев вахъана улкаялъулго чемпионлъун ва босана меседил медаль. Къурбанил дандиявлъун вукIана махщел-гьунар бугев Европаялъул чемпион Виталий Щур. Финалалъул заман иналдего Нажмудиновас ракIчIараб бергьенлъи босана (9:1). Цевеккунги гьев бергьун вукIана ункъгоясдаса.

Къурбан ккола Рязаналда бугеб гугариялъул школалъул тарбиячи. Гьанже гьев лъадарулев вуго Москваялда бугеб «Спартак» клубалда. Цебеккунги 2015-2016 соназ Къурбание щун букIана 3 мазгарул медаль.

Баркулеб буго Къурбанида тIадегIанаб бергьенлъи. Аллагьас къуватги сахлъиги кьейги гьесие хадубккунги жеги чIахIиял бергьенлъаби росизе.