ГIасрабаз цIунараб наслабазухъе
2022 сон бихьизабун буго Россиялъул халкъазул маданияб ирсалъул сонлъун. Гьеб бихьизабиялъул мурадлъун буго киналго халкъазул миллиял гIадатал, тарихалъул ва маданияталъул памятникал, этнокультурияб рахъалъул батIи-батIиял тайпаби, миллияб хаслъи, халкъияб махщел цIуни ва гIатIидго лъазаби.
Халкъияб махщелалъул ва материалияб гуреб маданияб ирсалъул лъагIалиде руссарал гIемерал фестивалал, ярмаркаби, тематикиял выставкаби, лекцияби, мастер-классал творческиял коллективазул концертал тIоритIизе руго РФялъул регионазда тIолабго соналъ.
Нилъер районалъ хасаб бакI ккола маданияб ирсалъул памятниказул къадаралъ. Гьеб бечелъи загьирлъулеб буго ункъогоялдасаги цIикIкIун архитектурияб памятникалдалъун. Гьезда гьоркьоса 25 республикаялъул ва 55 федералияб кIваралъул руго. Гьел ккола гьоркьохъел гIасрабазул кулаби, XII- XVII гIасрабазул хабалал, ракьулъ ругел мажгитал, рикIкIен гIемерал мажусиязулал петроглифал, XI-абилеб гIасруялъул христианазул храм, ХIотода, Мусрухъ, Гьоор, ГьентIа ва КъахIиб басриял росабалъ цIунун хутIарал сиял. 11 тIарикъаталъул устар жанив вахъараб Шамил районалда руго XVII-XVIII гIасрабаз рарал 20 гIанасеб минарабигун мажгитал. Гьеб букIана районалъул жамагIат динияб ва политикияб экстремизмалде гъоркье дагьаб къадаралда гурого ккунгутIиялъе аслияб гIиллалъун.
Районалъул бечедаб тарихияб ирсги, этнокультурияб хаслъиги цIуниялъул ва гIун бачIунеб гIелалъухъе гьеб щвезабиялъул мурадалда райгазеталъул редакциялъ администрациялъул кумекалдалъун байбихьи лъолеб буго «Шамил районалъул маданияб ирс» проекталъе. Газеталъул гьурмазда гьеб ирс рагьизе буго «ГIасрабаз цIунараб наслабазухъе» абураб рубрикаялда гъоркь.
Проекталда рекъон росабалъа гьаризе руго репортажал, бицине буго цересел архитектуриял тарихиялгун маданиял памятниказул, районалъул жамагIатазул гIадатазул хаслъиялъул, шагIирзабазул, хъвадарухъабазул, махщелчагIазул ва диниял церехъабаз тараб рухIияб бечелъиялъул.
Гьел тематикабазда хурхараб кинаб бугониги информация нужехъ батани, гьарула райгазеталъулгун бухьен гьабе, ялъуни газеталъул электроннияб почтаялде битIе qazeta.yedinstvo@mail.ru .
Жидерго кьалбаздаса тIезарурал гIадамал цIакъ къанагIат гурони лъугьунаро рухIияб рахъ къадруялда ккурал ва киналго къваригIунел хасиятал цIунарал гражданаллъун. Гьелъ, гIаммаб хIалтIудалъун цIунизин нилъерго районалъул рухIияб ва миллияб ирс!
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
