Районалъул ахIвал-хIал

Данделъиялда гIахьаллъи гьабуна ОМВДялъул нухмалъулесул ишал тIуралев МухIамад МухIамадовас. Гьединго, оперштабалде ахIун рукIана вакцина гьабиялъул процент гьоркьохъелдаса гъоркье бихьизабулел ругел росабазул бутIрул ва больницаялъул хIалтIухъаби.

ТIоцеве районалда бугеб ахIвал-хIалалъул бицун кIалъана райбольницаялъул бетIерав тохтир Ибрагьим Халилов. Гьесул баяназда рекъон, 9 февралалде унтаразул къадар больницаялда -22 чи, рокъорго дару-хер гьабулезул къадар -322 буго.

Гьединго, гьесул рагIабазда рекъон районалда 9 февралалде щвезегIан вакцина гьабун буго 10389 чияс.

ЦIияб коронавирусалъ ва пневмониялъ унтаразе хIадурун буго 30 койка, гьезда гьоркьоса 15 буго кислород чIезабулел.

КъваригIараб дару-хералъул ва дезсредствабазул цо моцIалъе хIисаб гьабун гIураб къадар буго райбольницаялда чIезабун.

Районалда бищун цIикIкIарал унтаразул къадар буго Гъоркьа Бакълъухъ, ТIидиб, Гьолокь, ХIебда, ГIурада, Ругъелда, Ракьуб, ЦIияб ГIурада ва ТIаса Бакълъухъ росабалъ. Гьединаб ахIвал-хIалги хIисабалде босун данделъиялде ахIун рукIана гьел росабазул бегавулзаби ва медицинаялъул жавабиял хIалтIухъаби. Щивасдаса тIалаб гьабуна гIадамазда гьоркьоб бичIчIи кьеялъул хIалтIи цIикIкIинабизе.

Хадубккун Камил МухIамадовас баян кьуна вакцинация тIадаблъун рихьизарурал хасал категориязда прививкаби гьариялъул. Гьес цоги нухалъ ракIалде щвезабуна данделъиялда гIахьаллъаразда тIолго Дагъистаналда ва гьединго нилъер районалдаги коронавирусалъул иргадулаб карачел кутаклъулеб букIиналда бан, цIакъ кIвар буссинабизе ккараб хIал букIин. Бицана профилактика ва цIуна-къай гьабиялъул, общественнияб транспортазда ва помещениябазда маскаби разариялъул. Камил МухIамадовас оперштабалъул членазда ва росабазул жавабчилъи бихьизабуразда тIадкъана вакцинаби гьариялда хадуб хасаб хал кквезе.

Гьединго, росабазул жавабчилъи бихьизабун букIарал оперштабалъул членаз 21 январалъ тIобитIун букIараб ахирияб данделъиялдаса коронавирус тIибитIиялде данде къеркьеялъе гьабураб хIалтIул отчет кьуна. ГIадамазда гьоркьоб бичIчIи кьеялъул хIалтIиялъе гьарулел ругел тадбиразул баян кьуна райгазеталъул редактор ПатIимат МухIамадовалъ.

Коронавирусалъул цIияб штаммалъ унтаразда гьоркьор гIемер лъималги рукIиналъ, гьабизе байбихьун буго лъималаздаги вакцинаби. Нилъер районалдеги щун буго 12-17 саназул лъималазе 20 вакцина. Гьабизе бокьарал рачIине бегьула поликлиникаялде педиатрасухъе.

Унтаразул къадар цIикIкIунеб букIиналда бан, районалъул бетIерасул ишал тIуралес оперштабалъул членазда ва хасго райбольницаялъул бетIерав тохтирасда тIадкъана къваригIунебщинаб хIадурун чIезабизе.

ХIурматиял районцоял, администрациялъул ва медперсоналалъул рахъалдасан районалда эпидемиологияб ахIвал-хIал лъикIлъизабизе гьабулеб буго бажарарабщинаб. Гьарулеб буго нужедаги нужерго сахлъи цIуниялде буссараб гьеб кIвар бугеб суал тIалаб гьабичIого тогеян.