ХIежалдасан салам

Исламалъул щуабилеб рукну- хIеж тIубазе рес щун буго исана Россиялдаса 25 500 бусурбанчиясе. Гьездаса 10 000 чи руго Дагъистаналдаса сапар бухьарал. Гьал хириял къояз, къиматаб Маккагун Мадинаялдаса, нилъер жамагIаталде битIун бачIун буго ракьцоязул баркиялъул салам:

Россиялъул хIежалъул ишазул нухмалъулев,

Дагъистаналъул халкъияв шагIир

МухIамад ХIамзаев

Ассаламу гIалайкум, дир ракьцоял, хIурматиял диналъул вацал ва яцал! Баркула нужеда тIаде щолеб ГIарафадул къоги, гьелда хадубго бугеб хирияб Къурбан къоги.

Аллагьас нужер киназулго гьабураб гIамал аза-азариде бахинабун къабул гьабеги. ГIидалъул къоялъул баракат нужеда киназдасаго тIаса унгеги. Хадубккунги гIибадат гьабизе нужее сахлъигун гIумруги кьеги. РакIалда ругел мурадал тIурайги Аллагьас. ЛъикIаб гьабизе, квешаб тезе тавпикъги кьеги БетIергьанас. Амин.