Ц1адахъ рекъон х1алт1ани гъалат1алги дагьлъула

16 августалда нилъер районалда тIобитIана ДРялъул тохтурзабазул коллегия. ДРялъул сахлъи цIуниялъул министр Жамалудин ХIажиибрагьимовасул бетIерлъиялда гъоркь республикаялъул тохтурзабазул къокъа щвана Шамил районалъул ЦРБялде. Щибаб отделениялъул хал гьабун , гIунгутIаби загьир гьаруна ва гIолареб оборудованиегун техника хIисабалде босана. Больница бугеб ракьалъул хъвай-хъвагIай (зеленка)гьечIолъиялда бан, цин гьелъул суал тIубазе тIадкъана бетIерав тохтурасда, цинги цIияб пищеблок баялъе кумек гьабизе рагIиги кьуна министрас.

Хадубккун, райадминистрациялда тIобитIана тохтурзабазул коллегиялъул данделъи.

Гьенир гIахьаллъана районалъул бетIер М. ХIасанов, республикаялъул бетIерал специалистал торхтурзаби -коллегиялъул гIахьалчагIи, сверухъ ругел магIарул районазул ЦРБязул бетIерал торхтурзаби ва Шамил районалъул больницаялъул тохтурзаби. Данделъи нухда бачана ДРялъул сахлъи цIуниялъул министр Жамалудин ХIажиибрагьимовас.

ТIоцебесеб иргаялда тIаде рачIарал гьалбадерий саламгун кIалъай гьабуна районалъул бетIер М. ХIасановас.

Сахлъи цIуниялъул министерствоялъ гьабулеб бугеб хIалтIул , цере лъун ругел суалалгун масъалабазул бицун кIалъана Ж. ХIажиибрагьимов. Гьединго гьес кIвар буссинабуна республикаялда сахлъи цIуниялъул бутIаялда ругел гIунгутIабаздеги. -ГIемерал руго министерствоялда цере ругел суалал. Мисалалъе, нилъер тахшагьаралда гьечIо цониги тайпадулаб поликлиника. Руго гIемерал гIунгутIаби жидеде кIвар буссинабизе ккарал. Амма гьелда аскIоб лъикIабги рехсон, абизе бегьила Северияб Кавказалда бищун лъикIал махщел тIокIал тохтурзаби нилъер ругин. Гьелъиеги мисал , дагьал церегIан къояз Хасавюрталъул больницаялда лъураб операциябазул рекорд . Бидурихьазул Эндоваскулярная коагуляциялъул 53 операция гьабун буго цо къоялда жаниб. Гьеб Россиялъул рекордазул тIехьалдеги босун буго, — ян бицана сахлъи цIуниялъул министрас.

Шамил районалъул ЦРБялъул бетIерав тохтур Ибрагьим Халиловас гIатIидаб баян кьуна больницаялъул щибаб отделениялъ ва участковыял больницабаз гьабулеб хIалтIул. Районалъул больницаялда цере ругел масъалабазда гьоркьоб аслияб суаллъун тохтурзаби гIунгутIиялъул суал букIиналде кIвар буссинабуна гьес. Докладалъул щибаб бутIаялдасан жидерго тIадкIалъаялгун гIакълукьеял гьаруна республикаялъул бетIерал тохтурзабаз.

Коллегиялде хIадурлъулаго районалда сахлъи цIуниялъул бугеб ахIвал-хIал лъазе цебеккун бачIун букIана тохтурзабазул хасаб бригада, районалъул куратор, республикаялъул би босулеб станциялъул бетIерай тохтур Хадижат Танкаевалъул бетIерлъуда. Гьеб бригадаялъул сапаралъул хIасилазул бицун коллегиялда кIалъана Х.Танкаеваги, министрасул заместитель Р.Шахсиноваги, жиде-жидер махщалил бутIаялъул специалисталги. МухIканго рехсана районалъул сахлъи цIуниялда гIолел ва гIоларел рахъал. ЧIванкъотIарал нухал рихьизаруна къокъаб заманалда жаниб гIунгутIаби лъугIизаризе.

Аслияб масъала гьадинал данделъабазул гIунгутIаби церелъезари ва гьел тIагIинариялда тIад мухIканаб, рекъонккараб, цадахъаб хIалтIи нухда бачин букIиналде кIвар буссинабуна коллегиялъул ахиралдаги Ж. ХIажиибрагьимовас.