Сессия ХIажатал хIукмаби
1 июлалъ администрациялда тIобитIана райсобраниялъул иргадулаб 21 сессия. Гьоркьор лъурал суалалги рехсон гьеб нухда бачана райсобраниялъул председатель МухIамадамин Хизроевас.
Сессиялда гIахьаллъана районалъул бетIер МухIамад ХIасанов, райсобраниялъул депутатал, УСЗНалъул нухмалъулев И.ХIамзатов, КЦСОНалъул нухмалъулесул заместитель М. Нуров, Ветеринарияб управлениялъул нухмалъулев Къ. КъурбанмухIамадов, росабазул бегавулзаби, районалъул идарабазул нухмалъулел ва цогидал.
Сессиялда тIоцебесеб иргаялда Лъануб росдал цIияв бегавул ГIумар Аминтазаев вищана райсобраниялъул депутатлъун.
Районалъул социалиял хIажатал тIуралеб ва социалияб кумек гьабиялъул идара КЦСОНалъул нухмалъулесул заместитель М.Нуровас жидерго хIалтIул баян кьуна. ХIукуматалъ цо социалияв хIалтIухъанасда хадув вихьизавун вуго 9 чи. Амма хIакъикъаталда кумек къваригIаразул къадар цIикIкIун бугелъул, росабалъ кIудияб кумек щолин школлъималазул рахъалдасаян бицана гьес. Росабалъ ругел социалиял хIалтIухъабигун бухьеналдаги рукIун бажарараб кумек гьабеян абуна М.ХIасановас росдал бегавулзабазда.
УСЗНалъул нухмалъулев Ильяс ХIамзатовас бицана районалда ругел социалияб кумек хIажалъулезе кьолел ругел мухьазул къадаразул. -Цо минаялда жанир рукIуна цо чанго чи коммуналияб мухь босулев. Нижехъе рачIунел документазда лъалеб гьечIо хIакъикъаталда цо счетчикалда нахъа чан чи хъван вугевали. Бокьун буго киназего гIахьалаб формаялда рачIине росабалъан кьолел справкаби,-ян абуна И. ХIамзатовас
ГIи боцIиялъ хасел тIамиялъул бицун кIалъазе вахъана Ветуправлениялъул нухмалъулев Къ. КъурбанмухIамадов. Гьес баян гьабуна хъутабаздаса гочун бачIараб гIи-боцIиялъул къадаразул. ЦIакъго кIудияб кIвар буссинабизе кколеб суаллъун буго гIодоблъиялдаса бачIараб боцIуда унти бугищали балагьи. Больницаби, школабигун садиказде унеб гьанада хадуб хасаб бербалагьи чIезабеян лъазабуна М. ХIасановас. Цебе заманалде дандеккун дагьаб бугониги боцIи , гьелда сверун гьабулеб хIалтIулъги дандчIвалел квал-квалазулги бицана КъурбанмухIамадовас. Гьесул кIалъаялде тIадежубай гьабун гIатIидаб баян кьуна росдал магIишаталъул отделалъул нухмалъулев Гь. МахIачевас.
ЦIа ккеялдаса цIуниялъе гьабулеб бугеб хIалтIул бицун кIалъана районалъул бетIерасул заместитель ГIабдуразакъ Рамазанов.
Шамил районалъул Уставалда гьаризе тIадал хиса-басиязул бицана администрациялъул юрист А. МахIмудовас.
Райсобраниялъул регламент хIажалъиялъул ва гьеб щивасухъ букIине кколеблъи бичIчIизабуна депутатазда М. ХIамзатхIажиевас.
Районалъул муниципалияб библиотекаялъе ХIажи ГIариповасул цIар кьезе суалги борхана депутатазул хал гьабиялде. Гьебги ва цогидал суалаздасанги рекъонккарал хIукмабиги къабул гьаруна райсобраниялъул депутатаз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
