Чехиялдаса ансамбль нилъехъ гьоболлъухъ

Дагъистаналъул фольклориял коллективал кидаго гIахьаллъула халкъазда гьоркьосеб «Горцы» фестивалалда. Исана гьеб тIобитIана ичIабилеб нухалъ. Гьенир гIахьаллъана Чехия, Словакия, Иран, Сербия, Индия, Азербайджан, Казахстан улкабаздаса, Россиялъул батIи-батIиял регионаздаса ва Дагъистаналдаса кIикъоялда анцIгоялдаса цIикIкIун коллективаз. Фестивалалъул аслияб мурад буго мугIрузул ракьалда ругел гIадамазул яшав, гIадатал, маданият цебетIезаби ва цоцазулгун бухьен цIикIкIинаби.

Исанасеб фестивалалъул хасаб программаялда рекъон 29 июналъ нилъер районалде гьоболлъухъ щвана Чехиялъул «Олдсава» фольклорияб коллектив. Нилъер районалъул гIорхъода хIурматиял гьалбазда дандчIвай гьабизе ана райадминистрациялъул вакилзабазул делегация. ДандчIваялдаса хадуб районалъул бетIер МухIамад ХIасановас баркала загьир гьабуна Чехиялдаса гьалбазе. «Ниж цIакъ рохарал ва чIухIарал руго тIоцебесеб нухалъ нижер, гьалбал хирияб, ракьалде нуж рачIиналъ. Биччанте букIине нилъер ракIазулъ даимаб гьуинлъи, цIикIкIинабе маданияб ва рухIияб гъорлъжубай. Наслабазе мисаллъун хIутIаги нилъер гIаданлъи ва гьалбадеридехун рокьи»-ян абуна М.ХIасановас.

Райадминистрациялдаса официалияб бутIаялдаса хадуб киналго гьалбал, районалъул творчествоялъул коллективал, ясли-ахазул гьитIичал ана Къваниб бугеб лъималазул хIухьбахъиялъул «Рохел» абураб лагералде.

«Олдсава» ансамблялъул гIахьалчагIаз бихьизабуна жидерго кьурдабазул, кучIдузул ва гIадатазул бутIабаздаса гIуцIараб программа.

Гьалбадерида нилъер гIадатазул бечелъи бихьизабуна ХIебда, ТIидиб, Гьоор, Ругъелда росабазул ясли-ахазул , школазул ва клубазул вакилзабаз.

Гьалбадерие кьуна ракIалдещвеялъул сайигъатал, гьезда рихьизаруна районалъул тIабигIаталъул, тарихалъул ва гIадамазул берцинлъигун бечелъи.

Аваданаб, рохалилаб ахIвал-хIалалда ана дандчIвай.