ЦIодорлъи гьабиялъ цIунила нилъ
ХIинкъараб мехалъ лъимаца эбелалъул квенчIелалда гьумер бахчулеб гIадин, магIарухъе гIедегIана гIемерисел нилъер ракьцоял. Эбел-инсулракIлъималазда, лъималазул ракI гьаваялда ян абухъего, шагьаразда эркенаб гIумруялда ругеб мехалъ гIемеразул «заманбукIунаро» росулъе щвезе. Рихьуларо гьезда гIурдаллъарал хурзал, рехунтарал ахал, чIороголъарал годекIаби. Коронавирус хIинкъи цIикIкIараб унти букIиналда божуларелгицин росулъе рачIун руго,рехун тун шагьаралда бугебщинабгун.
Кванил нигIматаз машинабазул багажникалги цIезарун, рещтIун руго гьел умумузул ракьалда. Гьанир нигIматал гIезарулеб къагIидаги гIемеразда кIочон буго. Росдал яшавалдаса рикIкIалъарал гьезул наслуги буго, магIарухъ заман кин чIвалебали лъаларого, росабазул къватIал мерхьунел, тIегьарал гъутIбузде, мажгитазул михIмаразде ишанги босун селфи гьабулел.
Имангун гIакълу камилаз хъизанго къватIибе бахъун бахча-ахкъачIалеб буго, хурзал рекьулел руго. ГIисиназдагун чIахIиязда гьоркьоб бикьун буго хIалтIи. Ясли-ахазда жанир къан рукIарал гьитIичалгицин руго гъираялда чIахIиязе хIалае лъугьун.
Дунялго квегъараб вирусалъул хабаралъ гъугълъизабураб бетIер роцIиналъе гьелдаса кIудияб дару щибха букIинеб?
Нилъер районалъул нухмалъулелгун росабазул бегавулзаби кутакалда тIадчIун руго пандемиялъул заманалъул низам цIуниялда. Рукъулел, рикьулел руго маскаби, цIунулеб буго рацIцIалъи, «Инсан» фондалъгун цадахъ лъугьун цIехон тIатинарулел руго росабалъ ресукъал хъизанал, гьезухъе рокъо-рокъобе щвезарулел руго кванил нигIматал.
Хасаб комиссияги гIуцIун хал кколеб буго тукабазда багьаби цIикIкIинабулезда хадубги.ЦIуна-къай гьабеян гьоркьоса къотIичIеб хитIаб буго бакIалъулал нухмалъулезул, исламалъул церехъабазул.Гьеб гIадахъ босуларезда цIодорал чагIиянги кинха абилеб. Жидедего ва жалго сабаблъун цойгидазде захIмат бакIарулеб букIиналъул пикру гьабулеб гьечIо гьез.
Мадугьалзаби, гIагарлъи цоцахъе хьвадун тепси-сурпаялда нахъа гIодорчIейги гIемерго дагьлъунги буго, жеги кьваризабуни заралги букIинаро. Жиде-жидер рукъалъул магIишаталде машгъуллъун руго гIемерисел. МагIарухълъи бокьулев чиясе заман букIунарелъул хIалкъалеб, чIалгIунеб бугин зигардизе, хасго ихдалил заманаялъ. Нилъерго талихI буго тIабигIат бокьулеллъун, гьелъул берцинлъи бихьулеллъун ратиги.
Гьаб пандемиялъ чIезабураб низамалъул бакIлъи тIаса босулеб буго сверухъ цIилъулеб тIабигIаталъул берцинлъиялъ. Щукру буго БетIергьанасе гьаб баракатаб ракьалда рижун ратиялъухъ.
ЧIороголъулел росаби чIаголъиялъе сабаблъун кьураб батайги нилъее гьаб хIалбихьи.
ПатIиматГьитIинова
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
