АваргIурул рагIалда гьалбал лъалхъулеб рукъ

Дагъистаналда туризм цебетIеялъе гIуцIараб программаялда рекъон, нилъер районалда 21 сентябралда рагьана туристазул хаб. Аслиял туристазул маршрутазда республикаялда букIине буго кинабниги 8 хаб. Жакъа къоялде хIалтIизе биччан буго гьединаб лъабго хаб-гьалбал лъалхъулеб рукъ: Ирганаялъул хIорил рагIалда, Сулахъ гIурул гъварилъи бихьулеб Дубкиялъул борхалъуда ва Хунзахъ. Ункъабилеб рагьана нилъер районалъул ракьалда- АваргIурул мухъда, Датуна росдал рагIалда.

Туристазул хаб хIалтIизе биччайги районалъул юбилеялъул тадбиразда цадахъ ккана. Гьеб рагьулеб тадбиралда гIахьаллъана ДРялъул ХIукуматалъул председателасул заместитель ГIабдулмуслим ГIабдулмуслимов, ДРялъул Туризмалъул министр Расул Ибрагьимов, районалъул бетIер МухIамад ХIасанов, районалъул юбилеялде рачIарал хIурматиял гьалбал.

ЛъикIаб къимат кьуна ГIабдулмуслим ГIабдулмуслимовас туризм цебетIеялъе республикаялда гьабулеб хIалтIиялъе. Тарихалъулгун маданияталъул ирсалъ бечедаб нилъер районалъул туризмалъе ругел ресал рехсана гьениб гьабураб жиндирго кIалъаялъулъ Расул Ибрагьимовас.

Хадубккунги районалде рачIунел гьалбазе ва туристазе хIухьбахъиялъе лъалхъизе квегIенлъиялъе рукIина гьединал объектал.