Махщелгун лъай борхинабе, гIолилал

25 январалъ тIолго Россиялъул гьоркьохъеб профессионалияб ва тIадегIанаб лъай кьолел бакIазда цIалулез тIобитIула жидерго байрам – Студентазул къо.

Гьеб къо кIодо гьабула бищун студентазе эркенаб гIужалда: экзаменалгун зачеталги кьун, сессияги лъугIун хасалил каникулазул байбихьуда. Февраль моцIалъ росабалъ данделъарал студентазулгун дандчIваял тIоритIула гьел цIаларал школазда.

Санайил школабиги лъугIун арал нилъер районалъул цIалдохъабиги лъугьуна студентазул кьерде. ГIага-шагарго 600-650 гIанасев студент вуго нилъер районалъул гIолилазда гьоркьор гьабсагIаталда. Школа цIалун лъугIаразда гьоркьоса 80 процент гIанасел гIолилал уна тIадегIанаб лъай босизе. Гьездасанги цIикIкIунисеб бутIа гIолилазул ахирал соназ унел руго сахлъицIуниялъул махщалие цIализе.

Амма цIалун лъугIаниги цIакъ захIматго буго махщалида рекъон гIолилазе хъулухъ щвеялъул иш. ГьечIо гIолохъанал специалистазе хIукуматалъ чIезарурал хIалтIул бакIал.

Гьебго заманалда масъала буго сахлъи цIуниялъул гурел цогидал рахъазда гIолохъанал махщелчагIи гIолеб гьечIолъиялъул. Мисалалъе: нилъер районалъул Лъайкьеялъул идараялъ ахирисел соназ загьир гьабулеб буго ингилис мацIалъул, физикаялъул ва химиялъул мугIалим гIолел гьечIолъиялъул суал. Нагагь руго гьел специальностазде цIализе унел, аниги махщел щун хадуса тIад руссун росулъе хIалтIизе рачIунел гIолилал.

Щай гьеб гьедин бугеб?- ан абураб суалалъеги къокъаб жаваб щвезе рес гьечIо. Гьеб рагьизе нилъ лъугьани гIумрудул батIи-батIиял рахъазда хурхараблъун батулеб буго гIолилал магIарухъе нахъруссунгутIиялъул суал.

Районазда, росабалъ махщелчагIи гIолел гьечIолъиялъулаб суал хIукуматалъул даражаялда борхулагоги чанго сон буго. Амма масъала лъугIулеб хIасил гьелъул кинго кколеб гьечIеблъи нилъее якъинаб гьечIищха.

Масъала школазда унеб буго «Рабочая профессия» абураб цIияб программа. Исана тIоцере ритIана целевое направлениеги кьун «Школа-ВУЗ» абураб программаялда рекъон ДГУялда цIализе нилъер районалдаса выпускникал.

КигIан захIматал суалал данд чIваниги, лъикI цIалулезул ва лъикIаб махщелчагIазул къимат кидаго ва кибго букIана. Нилъер районалъул администрациялъги гьабулеб буго гьединал студентазе квербакъи. Араб соналъул апрель моцIалъ МахIачхъалаялда районалъул администрациялъ тIобитIана нилъер интеллигенция студентал ракIарараб кIудияб тадбир. Гьенир районалъул нухмалъулез цIалул лъикIал хIасилазухъ баркалаги гIарцул шапакъаталги кьун кIодо гьаруна лъебергогIанасев студент.

Студентазул къоги баркулаго гьарула гIолилазе цIалулъ бергьенлъабигун цебетIеял. Нужеегоги хайир бугеб халкъалъеги мунпагIат цIикIкIаб махщелги щун гIумру битIун ккайги киназулго. ГIолилал, нужер бажариялда бараб буго районалъулгун, республикаялъул къимат ва къадру!