Гьидалъ больницаялъул нухмалъулев хисана

ЦIиял харбал

Гьидалъ  больницаялъул нухмалъулев хисана

Дагъистаналъул сахлъи цIуниялъул министр Танка Ибрагьимовасул буюрухъалда рекъон Гьидалъ участкаялъул больницаялъул бетIерав врач хисана.

18 апрелалда  Т1идире, Гьидалъ участкаялъул  больницаялде щвана районалъул бетIер МухIамад ХIасанов, ДРялъул сахлъи цIуниялъул министерствоялъул хъулухъчагIи  МухIамад ГIисахIажиев, Мирза ГьитIинамухIамадов ва Виктория Асадулаева.

Гьез рагIа-ракьанде щун халгьабуна цIигьабун къачIараб больницаялъул, разиго хутIана больницаялъе гьабураб капиталияб ремонталдаса, коллективалъ унтаразе гьабулеб хъулухъалдаса.

  -Гьадинаб даражаялъул, курорт гIадаб бакIалдаги бараб больница нужер районалда гуребги, Дагъистаналъул районаздагицин гIемер гьечIо, –ян абуна сахлъи цIуниялъул министерствоялъул хъулухъчи МухIамад ГIисахIажиевас. – Цоги, нужер больницаялъул хаслъи буго гьанисан унтаразул гIарз бачIунгутIи. ГьанжелъизегIан вукIарав бетIерав тохтур МухIамадов ГьитIинохIажица коллективалъул   хIалтIи берцинго нухда бачиналъул хIасил ккола гьеб. Гьес 22 сон кьуна гьаб больницаялъе. 

      Хадубго гьес больницаялъул коллективалъе цIалана  МухIамадов ГьитIинохIажи больницаялъул бетIерав тохтурлъиялдаса гIодов теялъе  ва гьеб хъулухъ Ибрагьим Халиловасда тIадкъаялъе хъварал Танка Ибрагьимовасул буюрухъал.

ГьитIинохIажи МухIамадовас баркала кьуна больницаялъул коллективалъе, ва цIияв главврачасе гьарана хIалтIулъ тавпикъ.

Жиндаго гьабураб божилъиялъухъ баркала загьир гьабулаго Ибрагьим Халиловасги абуна цохIо руководителас гьабун лъикIаб хIалтIи лъугьунарин, гьелъие тIолабго коллективалъ хIаракат бахъизе кколин.