Меню
16+

Сетевой центр «Хебда-онлайн»

11.02.2022 08:46 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Тарбия кьварараб низамалъулъ буго

Автор: Р.Абакарова
корреспондент

Лъималазе тарбия кьеялъул хIакъалъулъ гIемер бицуна. Гьелда тIасан гьарула имамзабаз вагIзаби, мугIалимзабаз насихIатал, умумуз бицуна гьелъул хIакъалъулъ. Амма гIун бачIунеб гIелалъул тарбия къойидаса къойиде холеб буго. Гьелъие кинаб гIилладай бугеб?

ТIоцебесеб гIилла, букIине кколеб къагIидаялда тарбия кьолеб гьечIолъи. Дие бокьун буго гьаб заманалъ лъимал хвезарулел цо-цо аслиял рахъал рехсезе.

Лъималазул рахъ кквей

Жидерго лъимал рокьуларев чи вукIунаро. РухIгIан хириял гьел рукIиналъ, гьезда гIайиб хъвазе биччаларо чанго умумуз. Гьедин абуниги бегьилаан, гьелъ лъималазул гIамал-хасият хвезабулеб букIинчIебани. Гьединаб мугъчIвай батидал, гьезул «бахIарчилъиги» жеги цIикIкIуна хIалихьалъи гьабизе. Гьаб заманалда жаниб мугIалимзабазул бищун унтараб суал буго, лъималазул гIадлу холеб бугин абун умумузде ахIи базе ккей. Нилъер районалда цо-цо эбел-эмен камуларо лъималазул рахъги ккун, учительзабазде гIайиб рехулел ва гьезулгун дагIба-къецал гьарулел. Гьединабго мисал букIуна мадугьалзабазул лъималгун тункагIуси ккедалги. Жидерго лъималазул гIайиб бахчиялъ, дагьабги гIадлу хварал лъугьуна гьел. Гьединлъидал, лъимал цIакъго цIунизе бегьулареб, гьелъул гIаксалда, гьезде гIайиб рехун, жидеца гIадлу гьабилин абизе рекъола. Гьелъ лъикIаб хIасилги кьола.

Телефонал роси

Жидерго гьумергIанисел кIуди-кIудиял телефонал росула чанги лъималазе эбел-инсуца. Цояз абула гьел хIажалъулин дарсал гьаризе, цогидаз абула пайдаял программаби ругин гьелда жанир. Психологазгун экспертаз абулеб буго гьелдаса зарал гуреб жо лъималазе щоларин абун. Гьединго школалъул мугIалимзабазги гьарулеб буго лъималазе телефонал росугейилан. Амма росулел руго къец гьабун. Кидаго телефоналде къулараб лъимадул тарбияги холеб буго ва гьениб бихьанщинаб гьабизеги лъугьунел руго.

Исламияб тарбия

Цо-цо умумузда ракIалда кколеб буго школалда щолеб лъай бугони гIолин гIумру гьабизе кканиян. Гьедин кIвар гьабичIого толеб буго динияб лъай. Цогидазда кколеб буго лъималазе захIмалъулин гьеб кIиябго цадахъ бачинеян абун. Гьелъие мисалги буго риидал гурони гIемерисез лъимал мадрасалде, мажгитазде ритIунгутIи. Инсанасе гIумру гьабизе ккани, чара гьечIого къваригIуна кIиябго лъай, ай дунявиябгун динияб. Дунялалъул лъай гьечIесе дунял гIуцIизе бигьалъуларебго гIадин, динияб лъай гьечIесе лъикIаб ахират щвезеги захIмалъула. Динияб лъай гьечIев чи цояб кваркьи гьечIеб хIинчIалда релълъуна

Лъималазе тарбия кьечIолъиялъул кьогIал хIасилал гIемерал рукIуна. Гьединал лъималаз тIубараб гIумруялъул рахIат щокъроб къазабула умумуздагун гIага-божаразда. Чанги руго интернеталда хъван ва гьединго телевизоралда рихьизарулел лъималазда гьоркьобги дагIба-рагIиги ккун, цоясда цояс нусал тункулеб. Гьединаб лъугьа-бахъин ккун букIана араб соналъ МахIачхъалаялда школалда цIалулел лъималазда гьоркьоб. Цояс цогидасда нусги тункун, гIумруялдаса ватIалъана 15 сон барав гIолилав. Гьебги буго тарбия загIипаб букIиналъул хIасил.

ГIемер рагIула умумуз малъулеб лъималазда, вореха, дуда кьабулев чи ккани, дуца гьев тIаса лъугьун тезе гурин, гьес кьабурабгIан дуцаги жеги тIадеги кьабичIого чIогеян. Исламалъ бихьизабухъе щай абулареб, воре, мун дагIба-къецалда гьоркьове лъугьунге, мун витIарав вугони, къецги къотIизабеян. Дуе зарал гьабулев чи ккани , гьесие данде лъикIлъи гьабеян.

Жиндирго лъимер бокьуларев эбел-эмен цониги вукIунаро. Амма букIине ккела кIудияс рокъоб гьитIиназе лъикIаб мисал бихьизабулеб лъимер. Умумузул аби буго: «ГIадлу-алжаналъул кIул бугин». БетIергьанас тавпикъ кьейги Аллагьасул Расул (с.гI.в.с) разияб куцалда, асхIабзабаз киниги, лъималазе тарбия кьезе. Аллагьас иман бугел, гIакълу-лъай бугел, эбел-инсул хIурмат ккурал, исламалъул нухда ине киназего нилъееги нилъер наслуялъеги тавпикъ кьейги.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1