РекIей хIалхьи щолеб шагьру-Рамазан

ТIаде щвараб баркаталъул жиб цIураб кIалкквеялъул моцI буго бусурбабазе рохеллъунги, исламалъул щуго хIубиялдаса цояблъунги. Хирияб ва дугIа къабулаб гIужлъун тIолабго жиб кколеб Рамазан моцI бачIиналъухъ гIищкъуялда ралагьун чIун рукIуна тIолго дунялалъул муъминзаби.

Рамазан моцIалъе Аллагьас кьун руго гIемерал хаслъаби, тIокIлъаби. ЛъагIалида жаниб бищун тIадегIанлъи бихьизабун буго Рамазан моцIалъе, гьелда жаниб бищун хирияблъун буго, ахирияб анцIго къоялда жанибе кколеб Лайлатуль-къадриян абулеб сордо. Гьеб сордоялъ гьабураб гIибадаталъул кири чанцIулго цIикIкIунеб гIадин, гьабураб мунагьалъухъ гIазабги кутаклъизе бугин абун буго тIахьазда. Рамазан моцIалъ рещтIана Къуръан бищун гъоркьиял зобалазде, гьениса бутIаби гьарун 23 соналъ халалъун рещтIана Аварагасухъе(с.гI.в.с.).

«Нужеца хIисаб гьабе вацал. Рамазан моцI дандекквезе бегьула Якъуб аварагасул (гI.с.) 12 васазда. Юсуф аварагги малъун гьесул 12 вас вукIаралъул, цо Юсуфил(гI.с.) гьариялъе гIоло хутIарал 11 вацасдаса Аллагь тIаса лъугьиндал, гьединго, рамазан моцIалъул баракаталдалъун хутIарал 11 моцIалъ гьарурал мунагьаздаса рацIцIалъизе рес буго нилъее, тIасалъугьиналъе мустахIикъаб хIалалъ нилъ хьвадани», -ян бицунеб буго вагIзаялда ЧIикIаса СагIид-афандияс(къ.с.).

ТIолабго гIамал нияталда бараб бугелъул, тIоцебе ниятги бацIцIад гьабун, ракIги гIодобе биччан, гIибадаталде руссине бищунго рес бугеблъун ва мустахIикъаблъун буго кIалккулмоцI. Муъминзабазе хIалбихьилъун бугеб Рамазан моцI ахираталъул рокъобе хайир бакIарулеблъун батаги щивасе.

Ифтар

Щибаб Рамазаналъ ифтарал тIоритIиялъе квербакъулел нилъер гIадамазул сахаватлъиги, гьел гьаризелъун цолъулел ва гъункулел гIолилалги цIакъ нилъ рохизе ккараб иш буго. Санайилго гIадин исанаги Рамазаналъул лъикIлъиялъул акция унеб буго районалда.

Шамил районалда «Инсан» фондалъул нухмалъулев Шамил ЗайнулгIабидовас Рамазан моцI тIаде щвейги баркун гьабулеб кIалъаялда баян гьабуна тIолго моцI лъугIизегIан щибаб къойил ХIебда кIудияб мажгиталда ифтар гьабизе букIин. Гьелдалъун, гIемерав чиясе — эхере-эхеде сапаралъ рахъаразе, рокъоса къварилъи бугезе, ХIебде къваригIелалъ щун тIадруссине заман гIечIезе ва цогидазе цIакъ кIудияб санагIалъи кколеб буго.

Хас гьабун ифтаразе абун бихьизабураб гIарац гьечIониги, гIадамаз гьабураб садакъаялдалъун районалдаги, нухаздаги, шагьараздаги цIакъ лъикIал ифтарал гьарун бажарулел руго гьал ахириял чанго саназ.