Меню
16+

Сетевой центр «Хебда-онлайн»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Зивуриб тарихалъул нахърател

Автор: Гитинова П.Д
Отв.секретарь

ГIасрабаз цIунараб наслабазухъе

ХIакъикъияб къагIидаялъ нилъер районалда буго рагьараб лъабго музей – ГIурада, ТIелекь ва МачIада росабалъ. Цо чанго школалдаги руго гIаммаб къагIидаялъ гьарурал музеял. Амма цо-цо тарихияб бечелъиялъул къимат гьабизе лъалезги квербакъула гIун бачIунеб гIелалъухъе умумузул ирс щвезабиялъе. Гьединазул цоявлъун ккола Зивуриса ХIамзатов ХIамзат МухIамадовичги. Наслабазе хазиналъун хутIулеб тарихалъул нахърател гIуцIун буго жиндирго рокъоб ХIамзатица.

ЦIакъ берцинго гIуцIараб ХIамзатил музей бихьизе, дагьал церегIан къояз гьесухъе гьоболлъухъ щвана редакциялъул хIалтIухъаби. Гъираялда нижее киналъулго баян кьуна гьес.

«Дица гьаб иш байбихьараб заман буго 90абилел санал, нилъер гьаниса Турциялде пахь бакIарулеб заман. Гьеб заманалъ, рокъоса къватIиве вахъарав дида ватана вац чердакалъул букIарабщинабги бакIарун, учузабго багьаялде цадахъ гьеб бичун кьезе унев. Дица вац тIадвуссинавуна. Нилъер умумузул квер хъвараб жо бугин, кибениги кьезе бегьуларинги абун, кинабго батаралъуб лъейилан витIана.

Гьелдаса хадуб дица бакIа-бахаризе байбихьана гIертIал, саргъасал ва цогидал тIагIелал. Гьел умумузул алатал ракIараралдаса хадуб дагь-дагьккун дир жеги гъира бачIана гьеб ишалде. Цо кIудияб рукъги къачIан, дица къайи-матахI цо бакIалде буссинабуна. Гьанже дица гьеб бакIарулеб букIин рагIидал, цояз бачIун, цояз бачIун умумузул алатал лъикIго цIикIкIана. Жакъа къоялде цIакъго гIиси-бикъинал алатал малъичIого, дир музеялда гIун буго 460гIанасеб тIагIел тIад номералги лъураб. Журналги гьабун, кинабго хъвай-хъвагIай буго хIадурун, щиб сунде хIалтIизабулеб баян гьабулеб. Жиб-жиб тIагIелалъул буго хасаб тарих, киналъулго бицине нилъее заманги гIеларо.

ТIад бугеб хъвай-хъвагIаялда рекъон, бищунго заман бараблъун буго дир музеялда умумузул раса. Гьелда тIад хъван буго гьижрияб къагIидаялъ азарабилеб сон, ункънусгоялдасаги цIикIкIун сон кколеб буго гьанже гьеб тIагIелалъе.

Щибниги дица гьалдаса босулеб пайдаги гьечIо, диего рекIее гIолеб хIалтIи букIун гьабулеб буго», -ян бицана ХIамзат ХIамзатовас.

Жеги ХIамзатица гьабун буго жиндирго тухумалъул мухIканаб цIех-рех. Цогидал тухумазулгун бухьенал гIемерал ратиялъ, гьесул лъугьун буго тIубараб тIехь «Зивуриса Мачиласул тухум ва цогидал тухумазулгун гьелъул хурхен» абураб. Чанго кьералъ цеве ваккун умумузул цIаралги бухьеналги хъван руго гьеб тIехьалда. Гьебги гьечIищ гьесул лъималазулги лъималазе нахъе толеб кIудияб бечелъи.

Чангоял руго гIумруялда жаниб цогIаги нухалъ музей бихьичIел ва киб гьеб бугебгIай цIехечIелги гIадамал. Амма ратула гьадинал чагIиги, жидерго ракIалъ ахIун, щибго мухь гьечIониги, тарихияб бечелъи бакIарун, наслабазе араб гIумруялъул гъваридаб тарих нахъе толелги. Гьеб ккола нилъер кIудияб божи бугеб гIумруялъул кьучI жинда жаниб бугеб гIасрабаз гIасрабазухъе кьолеб бечелъи.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2