Районалъул имам Г1абдула Г1умарчиевасул хит1аб.

КIиабизеги, бокьун буго нужедехун цогинухалъ цIакъ кIвар бугеб хитIаб гьабизе. Нилъеда бихьулеб буго сверухъ лъугьунеб бугеб захIматаб ахIвал – хIал. Къойилго цIикIкIунеб буго унтаразул къадар. Гьелда хурхун гIемерал батIи-батIиял харбалгун биценалги руго нилъехъе щолел. Сунда божилел, кинаб битIараб, кинаб тIекъабали лъалареб хIалалде колел руго гIемерисел гIадамал. Щибха нилъеца гьабилеб? Лъихъ гIенеккилел? Лъида нахъ рилълъинел? Къойилго нилъее рагьулеб хIакъикъаталъухъ балагьун, гьедин щакдарулезул къадар цIакъго дагь гурони хутIун батиларин ккола. Нилъеда Аварагас гIалайгьи салам, малъун тун буго, «нуж мутIигIлъе, нахърилълъа нужер церехъабазда, тIад ругел чагIазда»-ян. Нилъер динияб идараялъ, гьединго хIукуматалъул тIадчагIаз ва сахлъи цIуниялъул идарабаз нилъеде ахIи балеб буго, гьарулеб буго цIуна – къай гьабеян, чара къотIараб хIажатлъиялъ гурони рокъоса къватIире рахъунгеян. Рузман, жамагIат какал рокъор тIуразаре, тазияталъе росабалъе тIаде гъоркье хьвадун данделъаби гьаруге, телефоналъ ахIун, рокъобго дугIа – алхIам гьабун тIубазабе–ян.

КIудияб гьари буго нужеде,гьаб тIаде щвараб хирияб Рамазан моцIалъги, хириял къояз хобалазде хьвадун,данделъаби гьаругеян ва гьабулебщинаб гIибадат-гIамал рокъор чIун тIубазабеян. Гьаб хIалуцараб ахIвал-хIалалъул хIисабги гьабун, таравихI какал разеги нилъ мажгитазда данделъизе гьечIо. Рес буго жив – жив чиясе жидер хъизам – лъималгун цадахъ таравихIалги цогидал какалги рокъор разе, гьезиеги кири ва жамагIат щвезе.

ГIалимзабаз, тохтурзабаз, хIукуматалъул церехъабаз малъухъе хьвадизе Аллагьас нилъее тавфикъ кьеги. Аллагьас нилъги цIунаги балагьаздаса ва бергьараб унта – щокълъиялдаса. ВассаламугIалайкум варахIматуЛлагьи вабаракатугь.