Меню
16+

Сетевой центр «Хебда-онлайн»

20.08.2019 11:03 Вторник
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Заманалда рекъон босе цебе гали..

ЦIияб цIалул сон байбихьилалде щибаб санайил лъайкьеялъул идарабаз гьабула мухIканаб хIадурлъи. Гьеб хIадурлъиялъул хал гьаби тIадаблъун букIуна МВДялъул , МЧСалъул , Рособрнадзоралъул ва цогидал жавабиял идарабазда. Гьез рихьизарулел тIалабазде данде ккарал шартIал чIезаризе хIаракат бахъулеб буго районалдаги.

ГIемерисел школал ва лъайкьеялъул идараби руго къоабилеб гIасруялъго рарал минабазда жанир, лъабкъого соналдаса цIикIкIун жидеца барал. Гьединлъидал, жакъасеб къоялъул тIалабазда рекъон гьел чIезаризе гIезегIан захIматаб суал буго.

Нилъер районалда буго 67 лъайкьеялъул идара. Гьезда гьоркьоб: 20 ясли-ах, 43 гIаммаб лъаялъул ва 4 тIадеги лъайкьеялъул идара. Нижехъе щварал баяназда рекъон жакъасеб къоялде тIубан хIадурун буго 12 лъайкьеялъул идара. Цогидазда жеги унел руго ремонтазул хIалтIаби. Амма планалда рекъон киналго къачIан лъугIун рукIине ккола 30 августалде.

Капиталияб ремонт унеб буго районалъул 8 школалда. Гьезие кумеклъун руго пачалихъалъул батIи-батIиял программаби.

Мисалалъе, «100 школа» абураб проект. Исана гьеб «150 школа»ялде бахинабун буго. Гьеб программаялда рекъон басриял чIунтарал школазул минаби къачIазе ресал кьолел руго хIукуматалъ. Амма аслияб шартI буго пачалихъалъ биччалеб гIарцул къадаралъул цо пуланаб бутIа тIаде босизе кколеб буго спонсораз ва районалъул бюджеталъ.

Нилъер районалъул школазда гьоркьор, конкурсалда гIахьаллъун, тIаса рищарал ккана: ГIурада, Ругъелда ва ТIелекь №1 гьоркьохъел школал. ТIохал хисун, котельняби къачIан, классазда ремонтал гьарун жигаралда унел руго гьенир хIалтIаби.

Цойги, цIияблъун бугеб, «Точка роста» абураб федералияб программаялда рекъон щуго школалда рагьулел руго цIиял стандартазда рекъон хIадурарал кабинетал. Гьенире рачIине руго цIиял компьютерал, оборудование. 23 августалде кинабго хIадурлъи лъугIизе планалде босун буго.

Руго школал гIицIго районалъул бюджеталдаса биччараб гIарцуде къачIалелги. ТIогьохъ, Гьолокь, ТIасаБакълъухъ гьоркьохъел , Къваниб аслияб ва Датуна байбихьул школазда хисулел руго тIохал. ХIебда школалъе биччан буго отопление цIигьабизе, футболалъул майдан сверун къазе ва медкабинет къачIазе гIарац. Киналго рехсарал школазда хIалтIи рагIалде щун бугин абураб баян кьуна районалъул бетIерасул заместитель МахIач МахIачевас.

Районалъул бетIер МухIамад ХIасановас ва жавабиял нухмалъулез кIудияб кIвар буссинабун буго лъайкьеялъул идарабазде ва гьенир унел ругел ремонтазде. Школазда унел ругел хIалтIабазухъ хал гьабиялъул мурадалда росабазулъе гьарулел руго сапарал. Лъайкьеялъул цIиял проекталгун программаби яшавалде рахъинари мухIканаб бербалагьиялда гъоркь чIезарун руго.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1