Меню
16+

Сетевой центр «Хебда-онлайн»

20.08.2019 11:19 Вторник
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Дун чIаго вукIадго кье дие салам..

Сомодаса ТIалхIатил МухIамад

Киназего гIаммгьабун гIайиб чIвалев чи гуро

НасихIат

Бисмиллагь цебе гьабун, гьечIеб гьунарги босун,

Гьабулеб пишайилан алфазазул къед базин.

Суфизабаз кинниги рагIул магIна къокъ гьабун,

Каранзул рекIей хIалхьи хIарпаздалъун гIуцIизин.

РагIабазул кьочIода рекIел анищалги лъун,

Махщелго гьечIониги дагьал ганчIал сокIкIизин.

Заманаялъул ахIулъ дир гьаракьги жаниб тун,

Сабруялде ракI ахIун ирсилазе рикIкIизин.

ТIаде щвараб замана макьилъ гIадин букIине,

Жакъад гIолеб гIелалъе дагьабго баян тезин.

Умумузул ирсалъул адабият цIунизе,

Араб заманалъуса жавгьар бакъалда лъезин.

ГIадатгун гIамал ккурал гIолилазул къиссаби,

ГIун бачIунеб гIелалъе гьидаятлъун гьабизин...

Мадиро

Абизе бегьула магIарул росулъ

КIиго руссен бугин бухьен ккуразе.

Цояб харабазул цIураб годекIан,

Цояб хабаралъе санагIатаб кор.

Божизе тIалъула кIиго жоялда,

Дунялалъул харбихъ жиб хисулареб.

Жакъад-метерилан унеб гIумроги,

Нилъ руссине ругеб абадиятги.

Гьале дун, гьале мун, гьале цIадиро,

Пайда камун араб гIумро борцине.

Саназ санал хисун щолеб мадиро,

Гьабизе кколелъул пикро роцIине.

***

Мадугьалзаби

(Дир умумузул гьобол: мунагьал чураяв КIудияв инсан, ХIамидил АхIмадил вас МухIамадие сайгъат гьабула)

Къелеб, Гьидалъ абун росаби гьечIо,

Руссараб бакI буго мукъадиссияб.

Къелгун гьидерида ханзаби ккечIо,

Ханлъи хIехьолареб гIалам бижиялъ.

ГIемерал росабаз данде гьарурал,

Гьунар бикьун кьурал васазул ВатIан.

Гьоболлъиялъул цIар бода рагIарал,

ГIалимал гьарзаяб Гьидалъгиму Къел.

Умумузул гIадат кьочIое ккурал,

Камилаб лебаллъи бидулъ босарал.

Бараб ахIулъ ккедал яхI рехуларел,

БахIарзал гьарзаяб Гьидалъгиму Къел.

ЦохIо роценалъул кIиго мугIрул кIкIал,

Цого халипадулъ лъурал росаби.

Бакълъул рахъ хьунлъигун данде руссарал,

Росаби гьайбатаб Гьидалъгиму Къел.

Рохьаз бечелъараб Къелеб жаниблъи,

Жаниб гIалхул чаналъ ханлъи босараб.

ТIабигIат бергьараб Гьидерил тIалъи,

ТIагIамал пихъазул тIокIлъи рагIараб.

ГIакъилал умумуз цIунизе кьураб,

КьучIаб аят буго бичIчIи бугезе.

Мугъгиму чехь гIадаб кIиго жамагIат,

Даим вацлъиялда рукIайин абун.

***

Дир ракьул гъонохъе гIедегIуге нуж

Дир берал къанщидал, къанаби лъедал,

ТIалкъен цIалун дибир тIаде къулидал.

Бачараб пашманлъи гьурмаде реххун,

Дир ракьул гъонохъ чIун пашманлъуге нуж.

Гьабулеб хIалтIи тун, таксаби рачун,

Таманалго кепкал нухда хвезарун,

Налъи борхиналъе, нич цIуниялъе,

Дир ракьул гъонохъе гIедегIуге нуж.

Дун чIаго вукIадго кье дие салам,

Разияб гьимигун рещтIа дир рагьдухъ.

Дун аскIов вукIаго каке дун, вецце,

ГьечIеб тIад чIеларо, бугелъ теларо.

Дир къимат борцунеб роцен бичIчIизе,

Ракьул чохьонивищ дун лъезе кколев?

Реццалъул ихаца хобал лъалъазе,

ЛахIдоялъул къанал къазейищ кколел?

Дие бокьиларо пайда гьечIеб рецц,

Лъидехунги балеб гьечIо дица къец.

РакIалъ хIехьеларо, хIарамаб каки,

Гьелъий хIелиларо дир рекIел къвакIи.

Дун рокьарал рукIа дунгун чIагого,

ЧIарай жахIдаялъулъ бижараб кьищни.

ЧIаго рехе диде кьогIал гIайибал,

ГIодуге рихьдае хIухьел къотIидал.

ГIагар гьаре ракIал рухI босилелде,

Басралъи гIемераб гьаб дунялалда.

Жибго те жахIдалъи ратIалъилелде,

РацIцIад гьаре ракIал ахир щвелалде.

РачIунге нуж дихъе — ракьул гъонохъе,

Нужой къимат кьезе регIуларин дун.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2