Меню
16+

Сетевой центр «Хебда-онлайн»

20.07.2017 13:31 Четверг
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Дунялалъул борхалъи босарал гьалбал

Районалде вачIун вукIана дунялалъул бищун борхатаб Эверест мегIералъул тIогьиве жив вахарав тIоцевесев дагъистанияв, нилъер районцояв, Хучадаса ХIажиясулов Рашид ГьитIиномухIамадович.

ДандчIваял

 

Дунялалъул борхалъи босарал гьалбал

 

Араб анкьил ахиралда районалде вачIун вукIана дунялалъул бищун борхатаб Эверест мегIералъул тIогьиве жив вахарав тIоцевесев дагъистанияв, нилъер районцояв, Хучадаса ХIажиясулов Рашид ГьитIиномухIамадович.

Гьевгун цадахъ рукIана дунялалдаго жив машгьурав альпинист, СССРалъул ва Россиялъул альпинистазул командаялъул мустахIикъав тренер, ункъойилъа жиндир гIумрудул сонал арав Владимир Николаевич Шатаев, ХIажиясулов Рашидгун цадахъ Эвересталъул тIогьиве вахарав Ингушетиялдаса МухIамад Дзейтов, туризмалъул инструктор Евгений Федорович Козорезов, таможенияб хъулухъалъул федерациялъул  председатель Мамаев МухIамад Маллаевич, нилъер районцояв, Россиялъул МЧСалъул центроспас отрядалъул подразделениялъул нухмалъулев Гьоориса Къурбанов Къурбан МухIамадович ва цогидалги. Гьеб къоялъ районалъул бетIерасул заместителал МахIач МахIачевас, ГIабдуразакъ Рамазановас, Информцентралъул хIалтIухъабаз ва Рашид ХIажиясуловасул гIагарлъиялъ хIурматиял гьалбадерида дандчIвай гьабуна районалъул гIорхъода ва гьениса ана Хучада росулъе. Лъималазул хIухьбахъиялъул лагералда лъикIаб хIадурлъигун дандчIвай гьабуна гьалбадерида. Лъималаз рикIкlана альпинистазде гьарурал кучIдул, рихьизаруна церерахъинал, кIалъаял гьаруна Гьандихъ школалъул директор МухIамад Гъазалиевас ва цогидазги.

СССРалъул ва Россиялъул альпинистазул командаялъул мустахIикъав тренер В.Н. Шатаевас Рашид ХIажиясуловасе кьуна альпинистазул тIадегIанаб шапакъат  «Орден Эдельвейс».

 Рехсараб шапакъат Р.ХIажиясуловасе кьеялъул В.Н. Шатаевас бицана, араб талат къоялъ районалъул бетIерас жиндихъего  къабул гьаридалги.

 Гьалбадерица районалъул бетIерасе бицана туризм цебетIеялъе нилъер ракьалда гьалбал хIисабалда жидедаго рихьарал ресазул, тIабигIаталъул берцинлъиялъул. ЛъикIаб къимат кьуна архитектураялъул памятниказда сверухъ, нухазда ва хIухьбахъи гьабулел бакIазда нилъер гIадамаз цIунун бугеб рацIцIа-ракъалъиялъеги. Районалъул бетIер М.ХIасановас гьалбадерие бицана умумузул некIсиял росаби, сиял цIуниялъе, гьенире рачIунел туристазе шартIал чIезариялъе районалда гьарулел ругел ва хIисабалде росарал хIалтIабазул.

 МухIамад ГIумарасхIабов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4