МагIишат цебетIезабиялъухъ хасаб шапакъат

МагIишат цебетIезабиялъухъ хасаб шапакъат

29 апрелалда нилъер районалде вачIун вукIана Дагъистаналъул росдал магIишаталъул ва продовольствиялъул министр Мусафенди Велимурадов.

Гьев  вачIиналъул аслияб мурадлъун букIана бакIалдаго жидерго суалалгун гIадамал къабул гьари. Гьеб къоялъ министрас районалъул бетIер М.ХIасановасул ва райадминистрациялъул росдал магIишаталъул отделалъул нухмалъулев ГьитIино МахIачевасул гIахьаллъигун къабул гьаруна росдал магIишаталда хIалтIулел нилъер районцоял.

Гьолокьа МахIмудапанди МухIамадовас борхана росабалъ гIезабураб пихъ гIадамазухъа бичун босулеб, ялъуни лъикIаб даражаялъул компотал гьарулеб цех районалда рагьиялъул суал.

 Жиндирго магIишаталъул бицарав Микьигьориса МухIамад Садуевасе министрас гIакълу кьуна гьесул жиндирго магIишаталъе ва сверухъ ругел росабалъаги рахьги босун, хIан къалеб гьитIинабго завод лъуни лъикI букIинилан. Киналго хIажатал документал ругони, гьесул магIишаталъе грант щвеялъе квербакъилилан рагIиги кьуна М. Велимурадовас.

Зубаир СалихIовасул гIарз букIана росдал магIишаталъул министерствоялдаса гIолохъанав специалист хIисабалда гьесул васасе 2012 соналда щвезе кколеб букIараб гIарац щун гьечIолъиялъул. Гьеб суал роцIинабизе министерствоялде вачIани, лъикI букIинилан абуна министрас гьесда.

М.ХIасановасул цIаралда бугеб Сомодисезул гIаммаб магIишаталъул нухмалъулев И.Ибрагьимхалиловас бицана жидер магIишаталъухъ 3277 га ракьул бугин, гьездасан 80 гектаралда рис бекьулеб букIиналъулги. Гьелдаго цадахъ магIишаталъ тоннаялде гIагарун рахь щибаб къоялъ Гъизляралъул рахьдал заводалде кьолинги.  Министрасда гьес гьарана хъутаналда бугеб маг1ишаталде унеб кьо къачIаялъе кумекги. Гьединго борхана магIарухъе гIи гочинабиялъулъ дандчIвалел квалквалазул суалги.

Рук1ана цересел соназ гьабураб кумекалъухъ министрасе баркала кьезе  рач1аралги,  лъик1 х1алт1улеб маг1ишат бугониги х1укуматалъухъа щибго кумек щвеч1ин бицаралги г1адамал. Министрас абуна магIишаталъе бихьизабураб ракь букIине кколин, ракьул кьуч1аб документ гьечIого щибго кумек гьабизе ресги букIунарин.

 Росдал магIишат цебетIеялъулъ лъураб бутIаялъухъ Дагъистаналъул росдал магIишаталъул ва продовольствиялъул министрас ХIурматиял грамотаби  кьуна М. МухIамадовасе, М.ГьитIиновасе, М.Садуевасе ва АхIмад ХIажиевасе.

 Дагъистаналъул росдал магIишат цебетIезабиялъулъ рихьизарурал тIадегIанал хIасилазухъ хасаб шапакъат кьуна нилъер районалъеги.

 Районалъул бетIергун цадахъ гьеб къоялъ министр щвана Гьолокь консервазул заводалдеги.

МухIамад ГIумарасхIабов