Меню
16+

Сетевой центр «Хебда-онлайн»

17.05.2019 15:32 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

ХIасан ХIУСЕНОВ: Тохлъарав чи лъикIлъиялде цIцIай буго дир мурад

Автор: П. ГьитIинова

Нижер баян: ХIасан ХIусенов, гьавуна 1972 соналъ Лъахъ росулъ, мугIалимасул хъизаналда. 1989 соналъ лъугIана ГIурада школа. ЦIалана Дагъистаналъул политехнический институталда, Москваялъул Энергетикаялъул институталда. КIиабилеб тIадегIанаб лъай босулаго щвана- юристасул махщел. 2001 соналдаса нахъе вуго Россиялъул уголовно- исполнительная инспекция- абулеб системаялда хIалтIулев.

2017 соналъул июлалдаса нахъе районазда гьоркьосеб Хунзахъ бугеб уголовно-исполнительная инспекциялъул филиалалъул начальник.

«Нужер данделъабазул хабар цIализе бокьуларо»- ян абулел гIезегIанго рукIуна районалъул газеталде хабар ккедал. «Гьебги халкъалда лъан букIине бицине кколелъул. Щибха хъвалеб, щивав чиясул чвантиниб дунялалда бугебщинаб цIияб хабар рагьулеб телефон бугеб мехалъ?»-ин жаваб гьабула «ЛъикIал гIадамазул бице..»-ян абулел камуларо.

БитIараб буго, гIемер чи хутIула нижехъа мустахIикъаб кIвар кьечIого. ГIицIго рецц-бакъалъе гIоло сокIкIараб рагIиги гIадамалги нилъгоги махсароде ккураб жо буго. Амма

сверухъ ругел жидер ишги, хьвадиги бацIцIадал ракьцоязул мисаллъун бицине тIадабцин гьечIищха.

«ГIурус учитель»-ин абулаан росдалго лъималаз, гIумруго мугIалимлъиялъе кьурав, мунагьал чураяв Лъахъ росулъа АхIмад ХIусеновасде. ТIоцере цIалун рахъарал мугIалимзабазул цояв вукIана АхIмад. РитIухъав, гIужилаб рагIул, пасихIаб каламалъул чи вукIана гьев. ЛъикIаб гьунар букIана кочIохъего рагIи сокIкIинеги. Хъизан-рукъги букIана ХIусеновазул кидаго магIна бугеб, сундулъго мисалияб. ЛъикIаб тарбия-лъай щун гIезаруна щуго лъимал. Гьезул цояв вуго жакъа «ЛъикIал гIадамал» рубрикаялъул гьобол, жанисеб хъулухъалъул подполковник ХIасан ХIусенов. Лъицаго нахъасан тункичIого, жиндирго лъай-гIакълуялдалъун хъулухъалъ цеветIурав вас вуго ХIасан.

Россиялъул уголовно-исполнительная инспекциялъ 100 сон тIубараб юбилеялъул къоги букIана гьев нижехъего редакциялде ахIараб 7-абилеб май.

Нижер баян: ХIасан ХIусенов, гьавуна 1972 соналъ Лъахъ росулъ, мугIалимасул хъизаналда. 1989 соналъ лъугIана ГIурада школа. ЦIалана Дагъистаналъул политехнический институталда, Москваялъул Энергетикаялъул институталда. КIиабилеб тIадегIанаб лъай босулаго щвана- юристасул махщел. 2001 соналдаса нахъе вуго Россиялъул уголовно- исполнительная инспекция- абулеб системаялда хIалтIулев.

2017 соналъул июлалдаса нахъе районазда гьоркьосеб Хунзахъ бугеб уголовно-исполнительная инспекциялъул филиалалъул начальник.

- ХIасан, дида бичIчIухъе, туснахъалда лъезе гIечIеб такъсир гьабуразе къотIараб тамихI тIубазабулеб хъулухъ буго нужер идараялъул. Дур жавабчилъиялда буго Хунзахъ, Шамил, ЛъаратIа, ЦIунтIа районал ва БежтIа участок. Щибаб мухъалъул халкъалъул буго жидер хасият. Бигьаго букIунеб батиларо такъсирчагIигун хIалтIизе?

- Кинаб бугониги, жавабчилъигун гьабулеб хIалтIи бигьаяб букIине рес гьечIо. КигIан гьитIинабги рикIкIадабги росулъе ине ккола низам хвезабун хIисабалда вугев чиясул ахIвал-хIал цIехезе, халгьабизе. Жиндирго гIайибалъе мукIурлъуларо нагагьги чи. Берцинаб хабар бицун тарбия кьун, битIараб нухде вачине, жиндир гIайиб бичIчIизабизе, къосулев вукIиналъ рекIелъе инабизе хIаракат бахъула. Кибе бугъунги жиндир гIайиб бугин мукIурлъизе бокьуларо нилъер халкъалъе.

Дир хIисабалда, щиб хъулухъалда вугониги гьев живго вукIине ккола мисал босулеб лъикIаб, бацIцIадаб гIамалалъул, жамгIияталъе пайдаяв чилъун. «Духъго балагье»-ян бадибчIвай гьабичIого гьединав чиясухъ такъсирчигицин гIеккизе рес буго. ЧIахIиял хъулухъчагIаз чIахIиял такъсирал гьаридал, гIисиназги гIиси-бикъинаб гьабичIого толаро. Гьедин бегьулеб гIадин гIадатлъун билъанхъунги унеб буго. Законалъ, гIадатаз, диналъ тIалаб гьабулеб хIалалъ кинавго чи хьвадулевани тIакъсирчилъи лъугIилаан. Цо-цо мехалъ, туснахъалъусаги риччан жеги нижер тIалабалд ругезда бичIчIизабизе бигьа букIуна, гъозда низам лъалелъул. Нилъер магIарулал дагьал сабру гьечIел, пахруялги гьечIищха.

-Законалда рекъон низам билълъанхъизабулаго гIадамазда гьоркьоб ракIхвей камулеб батиларо. ХIинкъи кьолел рукIунищ?

- ГIиси-бикъинаб жо сабаблъун гIадамазда гьоркьоб рокьукълъи, тушманлъи бокьуларо дие. Амма хъулухъалъ тIалаб гьабулеб низам нижецаги цIуничIого рес букIунаро, гьеб буго ритIухълъи цIуни, такъсирчилъи дагь гьаби, обшествоялъул гIузраби дагьлъизари.

Исламалъул кьучIда мисал бачун, хIарам-хIалаллъиялъул, гIаданлъи-яхIалъул бицун бичIчIизабизе ккола чиясда жиндирго тIекълъи.. Нижго сабабалъе ккун квешаб гIамал тун лъикIаб рахъалде вуссарав чи вихьидал цIакъ ракI боххула.

Светский яги исламалъул лъай гьечIев чигун кIалъазеги захIмат букIуна, гьезул бичIчIи, дуниял бихьи батIияб букIуна. Бицараб жо ургьибего унарелги камуларо. Гьединазда хадуб халкквейги цIикIкIараб букIине ккола, гьездасан букIунелъул жамгIияталъе бокьараб квешлъи гьабилин хIинкъиги. Чанги батIияб ахIвал-хIал букIинарищха закон хвезабулел чагIигун хIалтIулаго.

- МагIишат гIуцIулаго, хъулухъ тIубалаго лъималазе букIине кколеб тарбия кьезе эбел-эмен регIулареб заман буго гьаб. Гьеб рахъалъ дур пикру?

- ЦокIалаб пикругун, цого рахъниса букIине ккола эбелалъулги инсулги лъималазе тарбия кьей. Эмен кидаго гуро регIулев лъималазда хадуб халкквезе. Эбелалъул бичIчIиялда ва тIалабалда бараб гIемер букIуна. Инсул мисал, хъизамалда щвараб тарбия-гьеб буго гIумруялъул къед балеб кьучI, жагъалго хутIани биххунги уна.

- МугIалимзабазде рехун тола гIемераз жидерго лъималазул цIалул жавабчилъи. Дур хъизамалда цIалуде цIикIкIун кIвар кьолеблъиги лъала..

-Школалъ кьолеб лъаялда гIей гьабун эбел-эмен чIезе бегьулеб заман гьечIо гьаб. Лъималазе цIалул программа захIматаб буго, гьеб биун рекIелъе тIун бажарулел мугIалимзабиги гIемер ругин абизе кIоларо. Жидерго лъай борхизабиялда тIад мугIалимги, эбел-эменги къойилго хIалтIизе ккараб заман буго гьаб. Дунялалъул цебетIеялда хадур гъезе ккани цого бакI мерхьунел рукIине бегьилищха.

-Школалъул дарсазул гурел цогидал тIахьал цIалулищ дур васаз?

- БитIараб бицани, дие бокьарабгIан гIемер цIалуларо. ТIехьалъ кьолебщинаб интернеталъги телевизоралъги кьоларин бичIчIизабула. ЛъикIаб тIехьалъ чиясул гIумруго хисизабизе рес буго. ТIехьалъ малъула берцинаб каламалъе, лъала ккаралъуб бицине рагIи, гIадамазда гьоркьор рукIа-рахъине, гъварилъула пикру.

- Нилъер магIарухъ жамгIияталъул гIунгутIилъун щиб бихьулеб?

- ГIаммаб ишалъухъ ракIунти, цадахъ жамагIат цо ишалде кIвар кьун хIалтIи дагьлъун буго. Добго телевизоралъ, гаджетаз жалго жидедаго руссараллъун гьарулел руго гIадамал. БатIалъи гьечIо, магIарухъеги щун буго глобализация. ГIемер захIмат бихьичIого къокъаб заманалда жаниб гIемераб гIарац щвей- гьеб лъугьун буго аслияб мурадлъун..

- Дурго лъималазул букIинесеб кин бихьулеб?

-ЗахIматаб суал буго. Дица бегьанщинаб гьабулеб буго гьел гIадамаллъун рахъине. Гьезул жидергоги цIалуде гъираги лъикIаб бичIчIиги буго.

Жидее щвараб лъаялда рекъон хIалтIулел, хъизамалда лъураб рухIияб кьучI цIунараллъун рихьизе бокьила. Росу-ракь бокьулеллъун, умумузул лъикIабщинаб гIадат, гIаданлъи цIунараллъун жидерго лъимал рихьизе бокьуларев чи вукIинаро. МугIалим ватаниги, цоги бокьарав махщелчи ватаниги, нилъеца гьабураб лъикIлъи яги квешлъи-гьеб тIадбуссинчIого хутIуларо. Тохлъарав чи лъикIлъиялде чи цIцIай буго дир мурад.

-ХIукумат какулел, жакъасеб гIумруялда рекъоларого гIемер чи вукIуна. Дур пикру?

-Нилъер улкаялда лъиего гьукъун гьечIо бокьараб лъай босизе. Лъай щварав чиясул гIумру квешаб букIине рес гьечIо. Гьединго рес буго росдал магIишат-яшав гIуцIизе. ХIукуматалъ кьолебщиналдаса битIун пайда босани чиясул гIумру квеш букIине рес гьечIо.

Нилъер гIумру лъикIлъиялъе гIоло хIукуматалъ гьабулебщинаб бичIчIунгутIи гьеб буго чиясул жиндиего заралияб лъавукълъи.

-ХIасан, ахиралдаги, баркула дуда нужер хъулухъалъул байрам-юбилей. Такъсирчилъи лъугIараб парахатаб, талихIаб гIумруги гьарула.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4