Меню
16+

Сетевой центр «Хебда-онлайн»

02.11.2019 15:47 Суббота
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Дагъистаналъул наслабазул анищ - Россиялъул паспорт щвей

Автор: Шагьабудин Озден
«ДАГЪИСТАН» журналалъул хIалтIухъан

Турциялъул маг1арулал Мах1ачхъалаялъул мэрасухъ. Шагьабудин Озден квараниса к1иабилев

Исана сентябралъул ахиралда Мах1ачхъалаялда бук1ана, дунялалъул бат1и-бат1иял х1укуматазда г1умру гьабун ругел, Дагъистаналдаса умумузул наслаби данделъараб форум. Форум рагьулеб тадбиралда г1ахьаллъана Дагъистаналъул нухмалъулел, жамг1иял х1аракатчаг1и, 21 улкаялдаса рач1арал бат1и-бат1ияб Дагъистаналъул миллатазул 300 чи. Гьезда гьоркьов вук1ана Турциялдаса маг1арулав Шагьабудин Озден. Гьединалго тадбиразде цевеккунги щун вук1ана гьев Дагъистаналде. Х1урматияб ригьалде вахарав маг1аруласул анищлъун буго Турциялда г1олел Дагъистаналъул наслабазе Россиялъул паспорт щвей. Гьеб гьари, пикру гьес чанц1улго загьирги гьабуна ч1ах1иял данделъабазда. Исанасеб форумалда Шагьабудиница гьабураб к1алъай кьолеб буго жакъасеб номералда.

Гьебги лъолеб буго Турциялъул маг1арулаз жидерго умумузул мац1 ц1унараб хаслъиялда.(ред.)

Ассаламу гIалайкум, хириял дагъистаниял!

ТIоцебе, гьаб берцинаб дандилъи гIуцIаразе ва ниж гьанире ахIаразе баркала кьезе бокьун буго.

Хириял ракьцоял, 1992 соналда МахIачхъалаялда гьабураб конгрессалда Туркиялдасан рачIун нижги гIахьаллъун рукIана.

Гьеб конгрессалъул макъсат-мурад букIана, дуниялалде тIиритIун ругел Дагъистаниязде умумузул ВатIан Дагъистанги бихьизи ва гIагарлъиги балагьун гьудул – гьалмагълъиги шуллалъизи.

1992 соналда конгрессалда, «ВАТIАН» гIуцIиялъ нижее Каспий ралъдал рагIалда мина базе бакIги Дагъистан – ГIурус паспортги кьези къотIи гьабун – рагIи кьун букIана. Амма гьел къотIаби рагIиялда хутIана.

Гьанжейин абуни эб мина балеб бакIго кIваричIин, нижее Дагъистан – ГIурус паспортал кьуни гIелаан, парахатго умумузул ВатIан Дагъистаналда рачIун – инзи.

Хъат гIанасеб Балгъария (Болгария) пачалихъалъцин Туркиялда гочун рачIаразе паспортги кьолеб буго ва Балгъариялъул чагIилъунги рикIкIунел руго. КIодихIияб ва гучаб Россиялъ щайдай кьолареб нижее паспорт?

Туркиялда Дагъистаналъул культураялъул микьго Дернек ( ассоциация) буго: Ялова, Бурса, Баликесир, Анкара, Кахраманмараш, Измир, Сивас ва Баликесиралъул Чамлы росу. Гьал киналго дернеказ Туркиягун Дагъистаналда ва Россиялда гьоркьоб кьоги лъун хъулухъ гьабула.

Думаялъул депутат проф. Сафаралиев Гаджимет Керимовичас цочан сон цебе (Sabah/ruvr.ru) румузгун гьабураб баяналда гьадин абун буго: «Рассия, Чарасул — Пачаясул заманалда Рассиялда рукIаразул лъималазе ва гьезул наслуялъе гIурус паспорт кьезе хIадурлъулеб буго» абураб гьаб баяналъул ва дир умумузул докуманалъул фотокопиги битIулеб буго.

Нижер тIалабал ва бербалагьи къокъго бицани гьадин буго. Вассалам.

Саламгун ва хIурматгун

«Туркия — Дагъистан Гьудуллъи Дернек» ва Яловаялда магIарул, турк мацIазда къватIибе биччалеб

«ДАГЪИСТАН» журналалъул хIалтIухъан Шагьабудин Озден

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

71