«Гьидерил бертин» бергьана

Лъабабилеб сон буго Дагъистаналда туризмалъул министерствоялъ нилъер ракьалъул рухIиябгун тIабигIияб бечелъи загьир гьабулел къецал тIоритIулаго. Исанасел гьел «событийный туризм»-ин абулел къецазда «Гьидерил бертин»-абураб церерахъин бихьизабуна нилъер районалъул маданияталъул идараялъул гьунарчагIаз. Гьеб конкурсалъул хIасилал гьаруна 21 декабралъ МахIачхъалаялда. НекIсияб гIадат-гIамал, ратIлил форма, кечI-бакъан ва кванил нигIматал рихьизарураб нилъер районалъул махщелчагIазул программа, «Этнокультурный туризм и народные традиции»-ян абураб номинациялда, тIоцебесеб бакIалъе мустахIикълъана.