Районалъул къадру борхинабулел гIолохъаби

Волейбол

 15 апрелалда  ХIотода росулъ тIобитIана Гьидерил Хочбарил кубокалъе гIоло волейболалъул къецал . Къецал рагьана ХIотода росдал бегавул МухIамад ХIажиевас. Къецал тIоритIиялъул аслияб мурадлъунги росдал бегавулас рехсана районалъул росабазул жамагIатазда гьоркьоб гьудуллъи-гьоболлъиялъул ва вацлъиялъулал бухьенал щула гьари.

 Турниралда гIахьаллъана кинабниги микьго команада. Балагьаразе гъира балеллъун лъугьана гьел къецал. ХIалуцарал хIаязул хIасилалда тIоцебесеб бакI босана ХIотода росдал командаялъ. КIиабилеб бакIалде бачIана ТIидиб ва лъабабилеб бакI босана Ругъелда росдал командаялъ.

 Бергьарал командабазе кьуна кубок, дипломал ва гIарцулал сайигъатал.

Гьаниб батIаго бицине мустахIикъаб буго ХIотода росулъ гьал ахирал соназ спорталъе чIезарурал шартIазулги. Школалда бугеб спорталъул зал гуребги росулъ руго мини-футболалъул, волейболалъул ва тIадагьаб атлетикаялъе хIадурарал хасал площадкаби. Гьел майдабазда къецалгун хIаял гьоркьоса къотIараб мехги букIунеб гьечIо. Росдал гIолилазе ва лъималазе мисаллъун руго щибаб сордойил спортзалалда спорталъул къецал гIуцIулел чIахIияб гIел.

****

Кунг-фу

 Гьакьадерил спортсменазул бергьенлъабазул сияхI цоги меседил медалалъ цIикIкIана.

8-9 апрелалда Санкт-Петербургалда тIобитIана кунг-фуялъул рахъалъ Россиялъул чемпионат. Рехсараб чемпионаталда гIахьаллъана нилъер районцояв, 90 килограмм цIайиялда цеве вахъарав Гьолокьа МухIамадтIагьиров Аслан. Асланица дандиязда тIад ракIчIраб бергьенлъи босана ва Россиялъул чемпионлъун вахъана.

***

Рукопашные бои

 10-14 апрелалда Анапаялда тIобитIана  Россиялъул тIадегIанал цIалул идарабазда гьоркьоб квералъ рагъулел (рукопашные бои)  къецал. Гьенив гIахьаллъана нилъер районцояв Сомода росулъа  ГIалиев Мурад ХирамухIамадович. 70 кг цIайиялда цеве вахъарав Мурадица турниралда босана кIиабилеб бакI.

****

Эркенаб гугари

 15-16 апрелалда Черкесск шагьаралда тIобитIана эркенаб гугариялъул рахъалъ тIолгороссиялъулаб турнир. Гьеб турниралда гIахьаллъана нилъер районцояв ТIидиб росулъа ХIусенов АлдухI ва босана лъабабилеб бакI.

ГIаммаб барки

 Хочбарил кубок босарал волейболистазда, жиде-жидер тайпаялъул спорталъул къецазда чIел босарал Асланида, Мурадида ва АлдухIида баркула гьезул бергьенлъи. Гьарула гьезие хадубккунги районалъул къадру борхинабизе къуват .